thimoval Grimoirien
Poète accompli
Durée d'inscription
Nombre de messages : 10 Localisation : Pays de Gayant Date d'inscription : 30/11/2005
| Sujet: LA FIN DU MONTE de jules mousseron Dim 4 Déc 2005 - 22:12 | |
| Ch'étot du temps d' l'étoile à queue Annoncé pa les arménachs. Not' coeur battot comme un hoch' queue Tell'mint qué nous avott's el trac !
In n' parlot fauque ed fin du monte, D' délug', d' boulevers'mint sans parel ! La lun', comm' du burre, allot fonte Dins l'immens' payèl du solel !
Et l'feu s'répandant su la Terre Couvrant l' mont' dé s' terrip fléau, Un grand trembelmint d'allot faire Craqu'ler not' planèt' comm' del chaux !
Ah ! c' cop-là, ch' n'étot point pou rire ! D'après l' prédiction des anciens, L'Etoile à queu', - n'y-a pas à dire, - Ch'étot vraimint la fin des fins !
Aussi chacun i riot jonne. Malgré l' prochaine égalité, Beaucoup trannott'n dins leu marronne D'vant l' grand jug'mint d' l'éternité !
El pus heureux ch'tot cor les biêtes. Tout l' z' animaux d' nos alintours N' sé souciott' pas eun' seul' milette D'être aussi près del fin d' leus jours.
Mais les avar's, les mauvais riches, Les égoïst's ed' parvénus, Ceux qui-ont toudis l'air d' s'in fiche, In v'là qui-étott'nt bin arkaius !
Les pauvr's, bons bougr's, par habitude Fixés su l'sort des sans-av'nir, S'démandott'nt avec inquiétude, Si d' l'autr' côté ch' n'étot point pir',
La vie humain' est si bizarre ! In y rincontr' peu d' gins contints, Et malgré tout, ch'est putôt rare Qu'in quitt' l'existenc' joyeus'mint.
Dins l' ciel rayonnant, suspindue Comme eun' bell' montre et s'chaîne in or, Infin l'étoîle à queue est v'nue Sans causer au monte aucun tort.
Quand in n'a pus vu cheull' comète, Chacun r'parlot d' ses émotions : « Mi, qui disot Zeph Cafougnette, J'avos bin pris mes précautions !
Avant qu' l'étoile à queu' s'amoutre, J' m'étos mis inter deux mat'las, Et tant qu'alle n'a point été outre, Ej' n'ai jamais bougé dé d'là...
Chaqu' momint j' rinfrognos m' n' échine Pou t'nir moins d' plache ed' large et d' long, Tout minc' comme inter deux tartines Eun' misérap trinque ed' gambon !
Ch'est vrai... in n' sait jamais... peut-ête Qué l' laine à mat'las m' protégeant, Dins l' z' espitur's ed' not' planète Ej' m'aros artrouvé vivant !
- Ouais ! qu'i fait l'un d' ses comarates Té pouvot fin bin réussir, Mais t' s'ros bintôt kaïu malate : Té t' s'ros innuyé à morir.
Qu'est-c' t'aros fait su l' tierr' du monte, Tout seul, dins l'Univers intier ? - « Bé, qu'i dit Zeph, acout' queu conte ! Eh bin ! j' m'aros mis cabar'tier ! » Textes protégés par © Copyright N° 79Z516A J'ai fort quièr el français, ch'est l' pu joli langache.
jules Mousseron
| |
|
sandipoete Fondateur
Poète émérite
Nombre de sujets
Meilleur rédacteur
Rédacteur ayant posé plus de 1000 messages
Poète accompli
Durée d'inscription
Nombre de messages : 9975 Age : 71 Localisation : Bousies (Nord) Date d'inscription : 05/04/2005
| Sujet: LA FIN DU MONTE de jules mousseron Mer 21 Déc 2005 - 19:57 | |
| In a eu chaud...
:Très heureux: | |
|